النوريكا 61 واحدة من البنادق القديمة الخفيفه السهله في التعمير و الدقيقة أيضا
دي بندقية نوريكا 61 عيار 5.5 مستعمله أشتراها صديق ليا و أول حاجه عملها هو أنه جبهالي علشان أعملها صيانه لأنها ببساطه بتعمر لكن ما بتضربش و محتاجه أيضا لنشان خلفي
من الواضح أن البندقيه شافت أيام صعبة لأن الحالة الخارجيه سيئة
النشان الخلفي بحاجه للتغير لأنه مكسر تماما
الحديد مدهون بدهان أسود و الخشب كذلك مدهون و المقبض مخروم لتثبيت حزام
لكن على الرغم من الحالة السيئة للبندقيه ألا أن كل الأجزاء الموجوده أصليه و لم يتم أستبدالها أو عمل أي لحامات في المعدن
فكيت الدبشك و نظره سريعه داخل الخشب بتبين أنه خالي من الشروخ
المسمار الموجود داخل الدبشك تحته سوسته و ده هو ألي بيحافظ على زراع التعمير ثابت في مكانه و واضحه من برادة الحديد أن الأحتكاك زياده شوية و بيسبب تأكل في زراع التعمير
يكون أفضل لو تم أستبدال المسمار بقطعه بلاستك (ده كمان هيعطي أحساس بالنعومه أثناء التعمير)
البلوك الحديد ألي ماسك الماسورة متقن الصنع و به ورد سوستة للتحكم في جهد التعمير و أيضا تضمن ثبات مسامير تثبيت الماسورة
نظام تثبيت الماسورة عن طريق بليه بدل لسان أنعم بكتير و أكثر سلاسه
الجلبه مقطوعة و بحاجه للتغير
الزناد بدائي جدا و بسيط لكن بيأدي اغرض ألي أتعمل علشانه
البندقية سهلة جدا في الفك بدون أستعمال منجلة لأن السوستة ضعيفه جدا و مستهلكة
أنا حاليا بحاجه لأيجاد سوستة بديله
و ده عن طريق قياس طول مشوار البيستم (6 سم) و سمك السلك و عدد الحلقات و أيضا قطر السوسته الخارجي
أقرب سوستة لها في القطر الخارجي هي سوستة الديانا 350 لكن قطرها الخارجي أكبر بحوالي 1 مم
مضطر أستعمل سوستة رمسيس و أقصر منها 4 حلقات (لأن سوستة النوريكا أقصر بكثير)
لسان التعمير على البيستم به بعض التأكل و الأنبعج مما يعطي أحساس بالخشونة أثناء شد الزناد
بصعوبه عرفت أساوي الطرف لأن الحديد متقسي
الجلبة الأصليه منتهية تماما و تم أستبدالها بجلبه رمسيس جلد
جلبة الرمسيس أتخن من جلبة النوريكا بكتير و غطاء تثبيت الجلبة بحاجه لتقليل قطره الخارجي (سهل جدا بأستعمال صنفرة) و كذلك الطول بحاجه لتقصير
بعد تجربة الجلبة عدة مرات تم سنفرة الغطاء البلاستيك بصنفرة ناعمة و تركيب البندقية (بأستعمال منجلة المرة دي علشان السوستة الجديده ناشفة)
ملاحظاتي على البندقية
أولا الوزن خفيف و سهلة في التعمير لكن حجم غرفة الهواء صغير جدا و بالتالي قوتها هتكون أقل من المتوسط
ثانيا نظام تثبيت البلوك رائع و ناعم جدا لكن به مشكلة واحدة و هي أن أحتكاك بلية تثبيت الماسورة بوش الكانون عمل فيه حفر و أكيد هيكون سبب في التنفيث
المشكلة دي موجوده مع لسان التعمير بتاع الرمسيس (في الرمسيس علاجها سهل ممكن وش الكانون يتساوى بالمبرد لكن في النوريكا الجزء السفلي ألي بيمسك البليه بيحول دون دخول أي مبرد) هو ده السبب أن شركات الديانا بتعمل وش الكانون و الماسورة بميل لأن الميل هايمنع أن البليه تطول فتحة خروج الهواء
ثالثا الشخشانات منتظمه و حادة و أفضل من الديانا القديمة
رابعا البيستم محكم داخل الكانون و لا مجال للأهتزاز يمين و شمال و ده شيء رائع و مش موجود حتى في الديانات الجديده
البندقية جميلة و دقيقه لكن ضعيفه بلا داعي و عيار 5.5 أكبر من أمكانياتها